មន្ត្រីគយនិងកាំកុងត្រូលសហការជាមួយប៉ូលិសចាប់រថយន្តដឹកសាច់មាន់ស្អុយ
Thursday, August 23, 2007
ខេត្តបន្ទាយមានជ័យ ៖ កាលពីវេលាម៉ោង១១យប់ថ្ងៃទី១៨ សីហា កន្លងមកនេះ មន្ត្រីគយនិងរដ្ឋាករ ខេត្តបន្ទាយមានជ័យបានរួមសហការជាមួយប៉ូលិសសេដ្ឋកិច្ចនិងមន្ត្រីកាំកុងត្រូល ចុះចាប់រថយន្ត១គ្រឿង ដឹកសាច់មាន់ខូចគុណភាពចំនួន២តោននៅលើកំណាត់ផ្លូវជាតិលេខ៥ ក្នុងភូមិសាលាក្រហម ឃុំសំរោង ស្រុកអូរជ្រៅ ខេត្តបន្ទាយមានជ័យ ។ លោកស៊ូ ស៊ីដេត អនុប្រធានសាខាគយ និងរដ្ឋាករខេត្តបន្ទាយមានជ័យបានឱ្យដឹងថា រថយន្ត១គ្រឿងដែល សមត្ថកិច្ចចាប់ឃាត់នេះម៉ាកកាមរី ស៊េរី៩៣ ពណ៌ស្លែ បានដឹកសាច់មាន់ខូចគុណភាពនាំចូលពីប្រទេសថៃ ចំនួន២តោន។ នៅពេលសមត្ថកិច្ចចាប់ឃាត់ដើម្បីធ្វើការឆែកឆេរនោះ អ្នកបើកបរនិងអ្នកជិះក្នុងរថយន្ត បានរត់គេចខ្លួនបាត់។ ទោះបីជាមានការគេចខ្លួនក្តី ក៏មន្ត្រីជំនាញបានធ្វើការស្រាវរកជ្រាវមុខសញ្ញាឃើញ ដែរ មិនអាចគេចខ្លួនបានទេ ។ លោកបន្តឱ្យដឹងទៀតថា ការចាប់ឆែកឆេរនេះគឺដោយសារតែឃើញ រថយន្តជាប់សង្ស័យបើកក្នុងល្បឿនលឿននៅចំណុចឆែកឆេររបស់គយក្នុងភូមិសាស្ត្រ ភូមិសាលាក្រហម នោះ។ ពេលសមត្ថកិច្ចធ្វើសញ្ញាឱ្យឈប់ដើម្បីត្រួតពិនិត្យនោះ រថយន្តនេះមិនព្រមឈប់ទេ ដូច្នេះហើយ ទើបសមត្ថកិច្ចបើករថយន្តដេញតាម ហើយដោយដឹងថាមិនអាចគេចរួចនោះអ្នកបើកបរក៏ឈប់រថយន្ត រួចបើកទ្វាររត់គេចមុនពេលដែលសមត្ថកិច្ចទៅដល់ ។ ក្រោយពេលពិនិត្យឃើញមានសាច់មាន់ខូចគុណភាពនោះសមត្ថកិច្ចក៏នាំយកទៅ ទីស្នាក់ការសាខាគយ និង រដ្ឋាករខេត្តទាំងកណ្តាលយប់ ។ លោកស៊ូ ស៊ីដេត បានបន្តថា តាមការស្រាវជ្រាវគឺរថយន្តនេះរកស៊ីដឹក សាច់មាន់ខូចគុណភាពច្រើនលើកមកហើយ តែសមត្ថកិច្ចដេញចាប់មិនបាន។ លោកបន្តថា សាច់មាន់ ខូចគុណភាពចំនួន២តោននេះ គឺឈ្មួញនាំចូលពីប្រទេសថៃតាមច្រករបៀង ប៉ោយប៉ែត ហើយបំរុងនាំ ចូលទៅលក់តាមបណ្តាខេត្តនិងទីក្រុងភ្នំពេញ ដែលគេទិញពីថៃក្នុងតំលៃថោក ហើយលក់តាមខេត្ត-ក្រុង បានចំណេញច្រើនទើបគេរកស៊ីល្មើសច្បាប់ប្តូរនឹងគ្រោះថ្នាក់បែបនេះ ។ លោកបានបន្តថា សាច់មាន់ខូច គុណភាពនេះបានដឹកទៅដុតនិងកប់ចោលនៅចំណុចដីទួលឆ្ងាយពីភូមិសិង្ហា ក្នុងស្រុកអូរជ្រៅ កាលពីថ្ងៃ ទី១៩ សីហា ។ ក្នុងពិធីដុតសាច់មាន់នេះមានការចូលរួមពីមន្ត្រីសាខាគយនិងរដ្ឋាករខេត្តបន្ទាយមានជ័យ មន្ត្រីគយចល័ត ប៉ូលិសសេដ្ឋកិច្ចខេត្តនិងមន្ត្រីកាំកុងត្រូលប្រចាំច្រកទ្វារ ប៉ោយប៉ែតផងដែរ ។ លោកស៊ូ ស៊ីដេត បានបញ្ជាក់ថា ក្រោយពីមានបទបញ្ជារបស់សម្តេចហ៊ុន សែន ស្តីពីការលួចលាក់ នាំចូលជ្រូក-មាន់ពីប្រទេសក្រៅរួចមក សមត្ថកិច្ចពាក់ព័ន្ធបានមានវិធានការទប់ស្កាត់និងបង្ក្រាប មិនឱ្យ មានការនាំចូលឡើយ ។
Source: ATKHMER
