តុលាការក្រុងចេញដីកាឃុំខ្លួនម្ចាស់ដីស្តុកសារធាតុគីមីផ្សំគ្រឿងញៀន
Thursday, August 23, 2007
23/08/2007
រាជធានីភ្នំពេញ ៖ ទោះបីព័ត៌មានពីការចាប់ខ្លួនឈ្មោះជា ជុង មានភាពច្របូកច្របល់កាលពីចុង សប្តាហ៍មុនដែលខ្លះថាចាប់បាន ខ្លះទៀតថាចាប់មិនបាន ហើយមន្ត្រីផ្លូវការនានាក៏បានព្យាយាមមិនផ្តល់ ព័ត៌មានណាមួយដល់អ្នកសារព័ត៌មានថែមទៀតនោះ ក៏ករណីរបស់ជា ជុង ហាក់ដូចជាមានការស្ងៀមស្ងាត់ មួយរយៈនាដើមសប្តាហ៍នេះ ។ ប៉ុន្តែបន្ទាប់ពីមានមរណភាពរបស់លោកឧកញ៉ាអ៊ុំ ឆាយ នៅមន្ទីរ ប្រឆាំងគ្រឿងញៀនក្រសួងមហាផ្ទៃ និងបង្កឱ្យមានការភ្ញាក់ផ្អើលពីគ្រប់មជ្ឈដ្ឋាននោះ នៅវេលាម៉ោង ៤រសៀល ថ្ងៃទី២១ សីហា ឈ្មោះជា ជុង ក៏ត្រូវបានប៉ូលិសព្រហ្មទណ្ឌក្រសួងមហាផ្ទៃនាំខ្លួនមកកាន់ តុលាការក្រោមការយាមកាមយ៉ាងតឹងតែងបំផុត ។ លោកចៅក្រមកឹម រ៉ាវី ក្រោយពីការសាកសួរបន្តិច ក៏បានចេញដីកាឱ្យឃុំខ្លួននៅពន្ធនាគារព្រៃ.សដោយ ចោទពីបទទាក់ទិន នឹងការនាំមកស្តុកនូវសារធាតុគីមីផ្សំជាគ្រឿងញៀន ដែលមានជាង៥តោន ។ ឈ្មោះ ជា ជុង បានរត់គេចខ្លួនតាំងពីថ្ងៃដែលសមត្ថកិច្ចសំរុកចូលក្នុងដីចំការរបស់ខ្លួននៅត្រែងត្រយឹង ស្រុក ភ្នំស្រួច កាលពីថ្ងៃទី១ មេសា ឆ្នាំ២០០៧ កន្លងមកនេះ ហើយមិនបានដឹងថា គេចខ្លួនទៅទីណានោះទេ។ តាមរយៈការចាប់ខ្លួននៅបាវិត ទើបដឹងថាឈ្មោះនេះបានរត់ទៅលាក់ខ្លួននៅប្រទេសវៀតណាម ។
Source: ATKHMER
